மறுபடியும் அவள் !

என் கனவுகளில் 

ஒளிந்திருக்கிறாய் காயங்களோடு !

என் காயங்களிலும் 

மறைந்திருக்கிறாய் கனவுகளோடு !

ஒட்டாது போயிற்று என்ற 

உணர்வுகளிலும் அமிழ்திருக்கிறாய் !

நாம் தைத்து கொண்டே இருக்கிறோம் 

நெய்யப்படாத ஆடையை !

தையலின் சுவடுகள் 

இருவரின் விரல்களிலும் !

ஊசியின் ரணம் எனக்கு மட்டுமே !

சின்ராசு 

10/28/2020

இறுதியின் மறுபக்கம்

ஒரு துளியில் தொடங்கியது !
சென்ற திமிரில்
பதுங்கியிருந்தது  பயங்கள் !

மூன்று வழிச்சாலையில்  வேகத்தடைகள்
மாலையில் வரைபடத்தின்
இடுக்குகளில் கருந்தேள்கள் !

கிழித்தும், குத்தியும், அறுத்தும்
தைத்தும் முழு பிண்டமாய்
துப்பி வெளிவந்தது !

அடர்ந்த இருட்டில் புதையுண்டு
வெளிச்ச வீதியில் மூச்சு !

பிளந்து எடுத்த பாம்புகள்
புதையுண்டு ரத்தம் கக்கின !

பாதாளத்தில் துரத்தி சென்ற
ஓவியம் தரை தொடவேயில்லை !

ஒன்று ஆழமாய்
மற்றொன்று நீளமாய்
சின்னதும் பெரிதுமாய்
பத்து புதைகுழிகளில்
குதறி கொண்டு இருந்தன
கரும்  பேய்கள் !

முடியுரா யுகத்தின்
ஓலங்கள் தொற்றி நின்றது !

செருக்கில்  ஆடிய
தாண்டவத்தின் பாதங்களில்
கண்ணாடிகள் !

கருவறைக்குள்
மறு புக வேண்டும்
கண் மூடி கரைதல் வேண்டும் !

பல யுகங்களுப்பின்
பிண வாடையோடு
பயணப்பட்டன பாம்புகள் !

கருஞ்சாட்டையில் சுழன்று
கம்பீரமாய் வந்து வந்து சென்றாள் !

வாழ்வின் வினோதமான நேரத்தை
அறைந்து சென்றது அன்பென்றது !

தார் எங்கும் தண்ணீர்
பல துளிகளில் மறுபடியும்
ஆரம்பம் !


சின்ராசு
11 ஜனவரி 2020